ఈ పాపం ఎవ్వరిది?

ఓ దుర్మార్గుడి చేతిలో అత్యాచారం చేయబడి, చంపబడిన ఓ తొమ్మిది నెలల పసికందు ఆత్మశాంతికై....ఈ కవితాశ్రు నివాళి 🙏🙏

ఈ పాపం ఎవ్వరిది?
ఈ నేరం ఎవ్వరిది?
ఆడదాన్ని ఆటబొమ్మగా చేసి ఆట ఆడించింది ఓ తరం
ఆటబొమ్మలతో ఆడే ఆడపిల్లల్నీ వదలక అత్యాచారపు ఆట ఆడుతోంది ఈ తరం

ఈ పాపం ఎవ్వరిది?
ఈ నేరం ఎవ్వరిది?
భ్రూణ హత్యలను పాతాళానికి అణగతొక్కాలని ఓ పక్క జరుగుతోంది రణం
మానవ మృగాల పైశాచికత్వానికి పసిపాపలకి సైతం తీరిపోతోంది ఈ భూమితో రుణం

ఈ పాపం ఎవ్వరిది?
ఈ నేరం ఎవ్వరిది?
పాలబుగ్గల పసిపాపలను కామవాంఛతో
చిదిమేస్తోంది ఘోర కలియుగం
పూలమొగ్గల తలపించే ఆ చిన్నారులని కాపాడే వాంఛతో ముందుకు రావాలి నవయుగం

ఈ పాపం ఎవ్వరిది?
ఈ నేరం ఎవ్వరిది?
విచక్షణా జ్ఞానం నే్ర్పించని తల్లిదండ్రులదా?
నైతిక విలువలు నేర్పించని విద్యాలయాలదా?
మార్పు కోసం తలవంచుకుని ఎదురుచూస్తున్న సభ్య సమాజానిదా?
మానవత్వాన్ని మంటగలిపిన ఈ రక్కసులకు కఠిన శిక్షలు విధింపక ముప్పూటలా మేపి పోషిస్తున్న ప్రభుత్వానిదా?

ఈ ఆధునిక యుగాన,
ఎక్కడ నుండి దిగుమతి అయింది దిక్కుమాలిన ఈ వింత జ్వరం అని అంతర్జాలాన్ని అడిగితే,
శోధనా యంత్రాలు సైతం మూగబోతున్నాయి

ఏ గ్రహం నుండి దిగివచ్చాయి ఈ వికృత జీవులు అని అడిగితే, మా సహచరులు కానే కావంటూ గ్రహాంతర జీవులు సైతం వెనుతిరుగుతున్నాయి

'ఏంటమ్మా ఈ ఘోరం' అని ఈ పుడమి తల్లిని అడిగితే, 'ఈ పైశాచిక మృగాలను కన్నది నేనేనా' అంటూ దీనంగా విలపిస్తూ నిలువెల్లా కంపిస్తోంది.

మరి
ఈ పాపం ఎవ్వరిది?
ఈ నేరం ఎవ్వరిది?

-తేజ