లోనుంచి చూస్తున్నా మౌనంగా..
దేహమనే ఇంటి కిటికీ లోనుంచి చూస్తున్నా దీనంగా..
శాశ్వతం కాని ఓ అశాశ్వతం, ఇంకెన్నో అశాశ్వతాల కోసం నిత్యం చేస్తున్న జీవన పోరాటాన్ని,
స్థిమితమే లేక అస్తిత్వం కోసం ఆరాటాన్ని,ఆస్తిపాస్తుల కోసం నిత్యం చేస్తున్న విశ్వ ప్రయత్నాన్ని
లోనుంచి చూస్తున్నా మౌనంగా..
దేహమనే ఇంటి కిటికీ లోనుంచి చూస్తున్నా దీనంగా..
నిన్నటి ముఖ్యాలన్నీ నేడు వ్యర్థాలకు ప్రతీకగా నిలుస్తున్నా, నేటి ముఖ్యాల కోసం నిత్యం చేస్తున్న జీవన పోరాటాన్ని,
అనిత్యపు ఈ ఆస్థానంలో, అక్కరకు రాని పేరుప్రశంసల కోసం నిత్యం చేస్తున్న విశ్వ ప్రయత్నాన్ని
లోనుంచి చూస్తున్నా మౌనంగా..
దేహమనే ఇంటి కిటికీ లోనుంచి చూస్తున్నా వింతగా..
ప్రవాహంలా పరుగాపక పోటీ పడుతూ నేనూ
చేస్తున్నా నిత్యం ఈ జీవన పోరాటం
అద్వైతాన్ని అటకెక్కించి, ద్వైతమనే సిరాలో పవిత్రాత్మని ముంచుతూ తేలుస్తూ నా అధోగతికి,
నేనే చేసుకుంటున్నా విశ్వ ప్రయత్నం
లోనుంచి చూస్తున్నా మౌనంగా..
దేహమనే ఇంటి కిటికీ లోనుంచి చూస్తున్నా వింతగా..
అంతరాత్మ అంతరంగాన్ని పెడచెవిన పెడుతూ, విషయవాంఛలకై నేనూ చేస్తున్నా నిత్యం ఈ జీవన
పోరాటం
ప్రక్షాళన పర్వం ఇకనైనా అమలు పెట్టకుంటే వృధా అయ్యేను పవిత్రమైన ఆ పరమాత్మని చేరే నా విశ్వ ప్రయత్నం
-తేజ
అద్భుతః
ReplyDeleteThanks Bharathi garu
ReplyDelete