Wednesday 2 October 2019

శ్రీమాత


ఎర్రని కాంతుల చల్లని చూపుల మాయమ్మ  శ్రీమాతా, నిన్ను నా మనసారా ధ్యానిస్తున్నాను.

ఎల్లవేళలా శుభములను చేకూర్చమంటూ మాయమ్మ శ్రీకరీ, నిన్ను నాలోకి ఆహ్వానిస్తున్నాను.

ఎప్పుడూ పద్మాసనియైన మాయమ్మ శ్రీలలితా,
నీకు నా హృదయాసనం సమర్పిస్తున్నాను.

ఎన్నో లోకాలకు ఆలంబనయైన మాయమ్మ శ్రీకళా,
నీకు నా ఆనందభాష్పాలతో అర్ఘ్యపాద్యాదులు సమర్పిస్తున్నాను.

ఎందరో భక్తులకు కొంగుబంగారమైన మాయమ్మ  శ్రీనిథీ, నీకు భక్తిప్రేమలనే వస్త్రయుగ్మములను సమర్పిస్తున్నాను.

ఎన్నో దేవలోక పుష్పములకే సౌరభాన్ని అద్దే మాయమ్మ శ్రీదేవీ, నీకు నా తలపులతో కట్టిన  పుష్పమాలను అలంకరిస్తున్నాను.

ఎంతో తేజోమూర్తివైన మాయమ్మ శ్రీదివ్యా,
నీకు నా ఆశాజ్యోతులతో కూడిన శ్వాసాదీపాలను సమర్పిస్తున్నాను.

ఎందరో అన్నార్తులకు అన్నపూర్ణవైన మాయమ్మ శ్రీవాణీ, నీకు నా పలుకులే నైవేద్యంగా సమర్పిస్తున్నాను.

ఎల్లవేళలా నా అజ్ఞానాన్ని తొలగించి నన్ను రక్షించమంటూ మాయమ్మ శ్రీవిద్యా, నీ పాదపద్మములకు సర్వస్యశరణాగతి చేస్తున్నాను.

- తేజ

No comments:

Post a Comment

నీ తలపు

  తలిచే నా తలపుకి ఓ పరుగే ఉంటే మరుక్షణం అది  నీ చెంతే ఉండెనులే నా ఎద సవ్వడికో పలుకే ఉంటే అది  నీ పేరే వినిపించెనులే కదిలే నా కన్నులకి ఓ భాషే...