ఊహా పయనం

ఎటుగా సాగుతోంది నా ఊహల పయనం అని ఆలోచిస్తే, ఆరాతీస్తే...

చూశా...నీ తలపులే ఇంధనంగా
ఆగని అక్షర శకటమై సాగుతున్న
నా ఆలోచనల కలాన్ని

చూశా...నీ తలపులే పువ్వులుగా
సువాసనల మాలికనే అల్లుతున్న
నా హృదయ దారాన్ని

చూశా...నీ తలపులే పల్లవిగా
మధురమైన గీతికనే ఆలపిస్తున్న
నా మది మౌనగళాన్ని

చూశా...నీ తలపులనే నదిలో
తెరచాప చుట్టుకొని పయనిస్తున్న
నా ఊహల నావని

చూస్తూనే ఉన్నా..
పుస్తకమై చదువమంటున్న నీ కన్నులని
పువ్వులతో పోటీపడుతున్న నీ చిరునవ్వులని

-తేజ

శ్రీమాత

చక్కని ఎర్రని నీ మోము
సదా వందనీయం

చల్లని నల్లని నీ చూపు
సదా కమనీయం

చిన్నని తెల్లని నీ నవ్వు
సదా స్మరణీయం

చిక్కని చల్లని నీ కరుణ
సదా వాంఛనీయం 🙏🙏🙏

-తేజ

నీ తలపులు

నల్లమబ్బుల వెనక దాగిన నీరు చినుకై కురిసే వేళ
మేలిముసుగు వెనక దాగిన నీ మోము తెలిసే

కొమ్మల మాటున దాగిన పువ్వులు విరిసే వేళ
నీ చూపుల వెనక దాగిన రహస్యాలు తెలిసె

పువ్వులలో దాగిన సుగంధాలు పరిమళించే వేళ
మదిలో దాగిన నీ తలపులు నిద్దురని తొలగించె

సుమగంధపు గాలుల స్పర్శనంతో మేను పులకరించే వేళ
నీ అందాల నవ్వుల దర్శనంతో మది పులకించె

మనసున దాగిన ఊసులు మౌనంగా మురిపించే వేళ
మౌనం వెనక దాగిన మది మాత్రం పదేపదే
నిన్నే ధ్యానించె

-తేజ